ട്രെയിലർ കണ്ട് തോന്നുന്നതൊന്നും അല്ല “ഭ്രമയുഗം”, ശൂന്യമായ മനസ്സോടെ കാണൂ – മമ്മൂട്ടി

Susmitha Panicker

February 12, 2024
1 min read
bramayugam bramayugammovie film Malayalammovie movie

അബുദാബി: കഴിഞ്ഞ ദിവസം അബുദാബിയിൽ ഭ്രമയുഗം സിനിമയുടെ ട്രെയിലർ ഗംഭീരമായ ചടങ്ങിൽ പുറത്തിറക്കി. മമ്മൂട്ടി അടക്കമുള്ള അണിയറപ്രവർത്തകർ ചടങ്ങിൽ പങ്കെടുത്തു. ട്രെയിലർ കണ്ടതിന് ശേഷം മമ്മൂട്ടി നടത്തിയ പ്രസംഗം ഇപ്പോൾ സോഷ്യൽ മീഡിയയിൽ ചർച്ചയാകുന്നു.

“ട്രെയിലർ കണ്ടാൽ നിങ്ങൾക്ക് പലതും തോന്നിയിട്ടുണ്ടാകും. പക്ഷെ ഒരു കഥയും മനസ്സിൽ വിചാരിക്കരുത്. സിനിമ കണ്ടതിന് ശേഷം ‘ഇങ്ങനെ വിചാരിച്ചു, അങ്ങനെ വിചാരിച്ചു’ എന്ന് തോന്നാതെ ഇരിക്കാൻ വേണ്ടിയാണ് ഇത്. സിനിമ ഒരു ശൂന്യമായ മനസ്സോടു കൂടി കാണണം. എങ്കിൽ മാത്രമേ സിനിമ ആസ്വദിക്കാൻ പറ്റൂ,” മമ്മൂട്ടി പറഞ്ഞു.

“യാതൊരു മുൻവിധികളും ഇല്ലാതെ ഇത് ഭയപ്പെടുത്തുമോ, ഞെട്ടിപ്പിക്കുമോ, സംഭ്രമിപ്പിക്കുമോ, സന്തോഷിപ്പിക്കുമോ എന്ന് നിങ്ങൾ ആദ്യമേ ആലോചിക്കരുത്. ശുദ്ധമായ മനസ്സോടെ വന്ന് സിനിമ കാണൂ. ഇത് പുതുതലമുറയ്ക്ക് ഒരു പുതിയ അനുഭവം ആയിരിക്കും. 18ാം നൂറ്റാണ്ടിന്റെ അവസാനം നടക്കുന്ന കഥയാണ് ഇത്. ഈ സിനിമ കാണും മുൻപ് ഒന്നും ചിന്തിക്കരുത്, ആലോചിക്കരുത്,” അദ്ദേഹം കൂട്ടിച്ചേർത്തു.

പ്രതീക്ഷകൾ ഏറെ

മലയാള സിനിമയിലെ ഏറ്റവും ചർച്ചാവിഷയമായ ചിത്രങ്ങളിൽ ഒന്നാണ് ഭ്രമയുഗം. മമ്മൂട്ടിയുടെ നായകത്വത്തിൽ പുതിയൊരു ഗെറ്റപ്പിൽ എത്തുന്ന ഈ ചിത്രത്തിന് പ്രേക്ഷകർക്കിടയിൽ വലിയ പ്രതീക്ഷയാണ്.

പ്രഖ്യാപനം മുതൽ പ്രേക്ഷകരെ കാത്തിരുപ്പിച്ച ഈ ചിത്രത്തിന്റെ പിന്നീട് വന്ന ഓരോ അപ്ഡേറ്റും പോസ്റ്ററുകളും പ്രേക്ഷകരെ സിനിമയിലേക്ക് കൂടുതൽ ആകർഷിച്ചു. ടീസറിന് ലഭിച്ച വൻ വരവേൽപ്പിന് പിന്നാലെ ട്രെയിലറും റെക്കോർഡ് സൃഷ്ടിക്കുകയാണ്. 2.38 മിനിറ്റ് ദൈർഘ്യമുള്ള ട്രെയിലർ സിനിമയുടെ ദൃശ്യഭംഗിയും മമ്മൂട്ടിയുടെ അഭിനയവും വാഗ്ദാനം ചെയ്യുന്നു.

മലയാള സിനിമാ ലോകം കാത്തിരിക്കുന്ന ഭ്രമയുഗം ഫെബ്രുവരി 15ന് തിയേറ്ററുകളിൽ എത്തുകയാണ്. മമ്മൂട്ടി നെഗറ്റീവ് ഷേഡിൽ എത്തുന്ന ഈ ചിത്രം സംവിധാനം ചെയ്യുന്നത് രാഹുൽ സദാശിവൻ ആണ്. ഭൂതകാലം എന്ന ചിത്രത്തിലൂടെ ശ്രദ്ധേയനായ രാഹുൽ സദാശിവൻ ഭ്രമയുഗത്തിലൂടെ പ്രേക്ഷകരെ ഞെട്ടിക്കാൻ ഒരുങ്ങുകയാണ്.

മമ്മൂട്ടിയ്ക്ക് ഒപ്പം അർജുൻ അശോകൻ, സിദ്ധാർത്ഥ് ഭരതൻ, അമാൽഡ ലിസ്, മണികണ്ഠൻ ആചാരി എന്നിവരും പ്രധാന വേഷത്തിൽ എത്തുന്നു. ട്രെയിലറിൽ ഈ താരങ്ങളുടെ മികച്ച പ്രകടനം കാണാം.

ആൻ്റോ ജോസഫിൻ്റെ ‘ആൻ മെഗാ മീഡിയ’ കേരളത്തിലെ തിയറ്ററുകളിൽ വിതരണത്തിനെത്തിക്കുന്ന ചിത്രത്തിന്റെ ഓവർസീസ് ഡിസ്ട്രിബ്യൂഷൻ ട്രൂത്ത് ഗ്ലോബൽ ഫിലിംസാണ് സ്വന്തമാക്കിയിരിക്കുന്നത്. ഫെബ്രുവരി 15ന് തിയറ്ററുകളിലെത്തുന്ന ഈ ചിത്രം മലയാളം, തമിഴ്, തെലുങ്ക്, കന്നഡ, ഹിന്ദി എന്നീ 5 ഭാഷകളിലായാണ് പ്രദർശനത്തിനെത്തുന്നത്.

2023 ഓഗസ്റ്റ് 17ന് ചിത്രീകരണം ആരംഭിച്ച ‘ഭ്രമയുഗം’ കൊച്ചിയിലും ഒറ്റപ്പാലത്തും ആതിരപ്പള്ളിയിലുമായാണ് പൂർത്തീകരിച്ചത്. 300ഓളം തിയറ്ററിൽ ഭ്രമയുഗം റിലീസ് ചെയ്യുമെന്നാണ് വിവരം.

ഭ്രമയുഗം തീർച്ചയായും ഫെബ്രുവരിയിലെ ഏറ്റവും വലിയ റിലീസുകളിൽ ഒന്നായിരിക്കും.

ഭ്രമയുഗം ഫെബ്രുവരി 24ന് തിയേറ്ററുകളിൽ എത്തും.